ውድ የዐማራ ሕዝብ እና የዐማራ ሕዝብ ወዳጆች፤ እንዲሁም ሰብአዊነት፣ እኩልነት፣ ፍትኅ፣ ዲሞክራሲና በሰላም አብሮ መኖር ለሚያሳስባችሁ ሁሉ፤ የዐማራ መረጃ ማሰራጫ ማዕከል (ዐመማ) (Amhara Broadcasting Center (ABC)) በተሰኘ ስም የተመሠረተ ተቋም ስናስተዋውቃችሁ በከፍተኛ የደስታና የኃላፊነት ስሜት ነው። 

የዐማራ መረጃ ማሰራጫ ማዕከል፤ ከደጋፊዎቹ በሚያገኘው የገንዘብ መዋጮ፤ የሳተላይት ቴሌቪዥን በመከራየት ፕሮግራሞችን በማዘጋጀት ስርጭት የሚጀምር ሲሆን፣ በተጨማሪም በዐማራ ሕዝብ ሁለንተናዊ ጉዳይ ላይ ለሚሠሩ የሚድያ ተቋማት ከክፍያ ነጻ የአየር ሰዐት ለመስጠት የተቋቋመ ነው።

የዐማራ መረጃ ማሰራጫ ማዕከል ነጻና ገለልተኛ ተቋም ሲሆን፤ አስተዳደሩም ለዐማራ ሕዝብ በሚቆረቆሩ ዐማራዎች በተዋቀረ ጠቅላላ ጉባዔ እና በጉባዔው በሚሰየም ቦርድ የሚመራ፤ እንዲሁም ሙሉ ተጠያቂነትና ግልጽነት ያለው አሠራር የሚከተል ነው።  

ከዚህም ጋር በተያያዘ፤ በዐማርኛ፣ በእንግሊዝኛ፣ በኦሮምኛና በትግርኛ የሚዘጋጁ እና በዐማራ ሕዝብ ጉዳይ የሚዘግቡና የሚተነትኑ ዝግጅቶችን የሚያቀርቡ  ቡድኖችንና ተቋማትን ለማግኘትና ለመወያየት ጥረቶች እየተካሄዱ ሲሆን፤ ወደፊት በነዚህ ቋንቋዎች ዝግጅቶች ለማቅረብ ፍላጎት ያላቸውን ሁሉ በመገናኛ ገጻችን ላይ በተቀመጠው አድራሻችን እንዲያገኙን እንጋብዛለን። በዐመማ ሳተላይት የሚሰራጩ  ወይም ሊሰራጩ የታቀዱ ዝግጅቶች በወቅታዊ ሁኔታ ዘገባዎችና ትንታኔዎች፣ በታሪክ፣ በፖለቲካ፣ በምጣኔ ሀብት፣ በማኅበራዊ ጉዳዮች፣ በባህል፣ በስነቋንቋ፣ በሳይንስ፣ በኑሮ ዘዴ፣ እንዲሁም በሌሎች ለዐማራ ሕዝብና ለአጋሮቹ ጠቃሚ አርዕስት እንደሚሆኑ ይጠበቃል።